KALIBO, Aklan — Sangka tricycle driver ro ginreklamo it anang pasaherong estudyante nga babaye bangud sa gina-alegar nga fare overcharging ag pag-alsa boses nga nagtuga it kahuy-anan sa tagreklamo, adlaw it Miyerkoles, Abril 16 sa banwa it Kalibo.
Matapos nga half-day ro sueod it opisina it Traffic Transport Management Unit (TTMU) it LGU-Kalibo kahapon, nagdangop eon lang sa Bombo Radyo ro biktimang si Mikay Iguiban ag residente it Oyo Torong St. Kalibo.
Suno kana nga halin sa Aklan Provincial Hospital hay nagsakay imaw it tricycle ag nagpahatud sa Roxas Avenue Kalibo.
Kat magbayad it P10 hay ginsukot imaw it dugang nga P5, apang nagpanindugan ro tagreklamo nga P10 eamang ro minimum nga pamasahe dugang pa nga imaw hay sangka estudyante.
Apang nag-insister sigon ro driver nga kueang ro anang pamasahe nga nagresulta sa andang pag diskusyon ag pag-alsa boses it driver nga nagtuga kana it kahuy-anan halin sa sambilog pang kasakay nana nga pasahero ag iba pang tawo nga naga-agi sa lugar.
Nag-abot pa sigon sa punto nga gin-usuyan nana it taripa ro driver agud nga maklaruhan sanda nga daywa kun sa siin klaru nga nakabutang nga ro minimum fare hay P10 ag may discount nga P2 ro estudyante ag senior citizen.
Raya suno kana ro unang kahigayunan nga may na-encounter imaw nga driver nga nagsukot kana it sobra sa anang nakasanayan nga ginabayad nga pamasahe.
Nabo-oe it tagreklamo ro body number it tricycle ag nakataeanang iga-turn-over sa taeatapan it TTMU pagkatapos it Kuwaresma agud nga madasig nga mausoy ro driver ag magpaathag sa anang bayolasyon.
Dugang pa nga owa sigon nakasuksok it uniform ro driver.
Plano man nana nga ipabaehag ro anang reklamo kontra sa driver sa Kalibo Municipal Police Station.
