Gina-imbestigahan it mga awtoridad sa Italy ro sangka eaeaki matapos makit-an sa anang bagahe ro ginpamaea nga ueo it sangka endangered crocodile.
Nadiskubre ro specimen sa ginpatigayon nga inspeksiyon it customs police sa Caselle Airport matapos mag-abot ro pasahero halin sa Miami, Florida. Nakaputos eamang sigon raya sa ordinaryong wrapping paper.
Ginkumpiska it mga awtoridad ro ueo it buaya bangud sa gina-alegar nga pagdaea it parte it sangka protected species nga owa it nagakaigo nga permit ukon certificate.
Posibleng magapangatubang ro eaeaki sa multa nga naga-abot sa 200,000 euros ukon pagkakakulong it hasta sa sang dag-on kon mapamatud-an nga nag-eabag sa laye.
Protektado ro mga endangered species sa idaeum it Washington Convention, ukon Convention on International Trade in Endangered Species of Wild Fauna and Flora (CITES), nga nagatuyo nga suk-ean ro ilegal nga pagbaligya it mga endangered nga sapat ag tanum.
