Nagpaguwa it report ro sangka independent United Nations investigation nga nagahambae nga may maeapnagon sigon nga pag-eabag sa tawhanong kinamatarung kontra sa mga unga nga Palestino sa Gaza ag West Bank, kaibahan ro mga posibleng pag-eabag nga pwedeng makabig nga crimes against humanity, war crimes, ag genocide.
Suno sa UN Independent International Commission of Inquiry on the Occupied Palestinian Territory, kaibahan ro East Jerusalem ag Israel, nga andang gina-usisa umpisa nga magtuhaw ro giyera sa tunga it Israel ag Hamas ko Oktubre 7, 2023.
Base sa andang datos, ginaboeobanta nga masobra sa 30% it mga namatay sa Gaza hay mga unga. Naga-abot man sigon sa masobra sa 20,000 nga mga unga ro namatay umpisa Oktubre 2023 hasta Oktubre 2025.
Suno kay commission chair Srinivasan Muralidhar, may mga ebidensyang nagapakita nga matsa ginhungod sigon ro pag-target ag pagpatay it Israeli security forces sa mga unga nga Palestino, ag posibleng indikasyon raya it intensyong ubuson ro populasyon sa Gaza.
Ginpunto man sa report ro padayun nga paggamit it mga mabaskog nga explosive weapons sa mga lugar nga may mga sibilyan, nga nagatuga it mataas nga numero it mga unga nga nagakamatay.
Dugang pa it komisyon, mas mataas ro porsyento it mga unga nga nagakamatay sa makaron nga giyera kumpara sa mga nagtaliwan nga bakbakan sa Gaza ko 2008–2009 ag 2014, kun sa siin, kapin sa 24% ro mga unga sa kabilugan nga numero it mga nagtaliwan sa pihak nga kinabuhi.
Mag-eowas sa mga namatay, gintaw-an man it atensyon sa report ro grabeng epekto it giyera sa ikamayad nga eawas, nutrisyon, ag mental health it mga unga bangud sa displacement, kakueangan sa pagkaon ag bueong kamana man ro kahalitan sa mga pasilidad medikal.
Sa West Bank ag East Jerusalem, gin-report man ro pagtaas it kinagamo it mga Israeli settlers kontra sa mga unga nga Palestino, kaibahan ro mga kaso it torture ag mapintas nga pagtrato sa mga detainee.
Samtang, hugut man nga ginpamalibaran it Israel ro mga pasibangud ag gintawag raya nga “defamatory” ag “libelous.” Suno kanda nga ginahimo nanda ro tanan agud nga malikawan ro kahalitan sa mga sibilyan ag gin-insister nga owa ginkonsidera it report ro mga aksyon it Hamas.
Ginpahayag man it Israel nga ro andang operasyon hay kaparte it pagsabat sa ginatawag nanda nga “constant terrorist threat” sa rehiyon.
