KALIBO, Aklan–Humakot it nagkaeain-eain nga reaksyon ag simpatiya ro viral video it sangka unga nga eaeaki matapos nga maging emosyonal sa pagkamatay it anang alagang ayam kat masunggaban it van sa banwa it Ibajay.
Suno kay Mariane Mag-apan Angeles, sangka pet owner ag residente it Brgy. Maloco, Ibajay nga napukaw ro anang baeatyagon matapos nga makita ro video it unga nga nagapangison.
Bilang sangka pet owner suno kana, nabatyagan nana ro kasubo nga presenteng na-eksperyensyahan it unga bangud maabo man imaw nga alagang mga ayam.
Agud nga mabawasan ro kasubo, ginpakamayad sigon nana nga makipag-angot sa pamilya it unga.
Nagdesisyon sigon imaw kaibahan ro anang bilog nga pamilya nga taw-an it sangka Chihuahua ro unga.
Dugang pa kara nga nakita nana ro matuod nga pagpalangga it unga para sa alagang sapat.
