KALIBO, Aklan — Ginkuwestiyon ni Atty. Harry Sucgang, sangka political analyst sa Aklan, ro kabahoe it ₱50-milyon nga padya nga gintaeana para sa impormasyong makabulig sa pag-aresto kay Senator Ronald “Bato” dela Rosa.
Suno kay Sucgang, masyado kabahoe ro kantidad it padya nga ginasugid nga naghalin sa intelligence fund it Department of the Interior and Local Government ukon DILG ag Philippine National Police, ag dapat usisaon kon angay ag bagay ro paggamit it nasambit nga pondo it gobyerno.
Ginmitlang man it political analyst nga posibleng maging mabudlay ro pagdakop kay Dela Rosa bangud sa anang mga koneksiyon bilang dating opisyal it kapulisan ag sa gina-alegar nga proteksiyong nababaton kara halin sa mga grupong rebelde.
Samtang, nataeupangdan man ni Sucgang ro ginasugid nga magkaibang pahayag nanday DILG Secretary Jonvic Remulla ag ko anang igmanghud nga si Ombudsman Boying Remulla angot sa isyu nga matsa ginagamit nga estratehiya agud nga magpataeang ag madaling madakpan si dela Rosa.
Sa pihak nga parte, nagapabilin nga mabahoe nga pangutana kun magamadinaeag-on ro mga awtoridad nga maaresto ro senador nga nagapangatubang sa warrant of arrest nga ginpaguwa it International Criminal Court (ICC).
