Ginsiguro ni DSWD Sec. Erwin Tulfo sa mga mamalidha nga pagasaea-on nanda it mayad ro kapin sa 1.3 million household 4Ps beneficiaries nga nakataeanang makakas sa programa.
Suno sa sekretaryo , sayod nana nga may pagkabaeaka ro mga mamalidha.
Ag sa mismong mga beneficiaries tag andang gin-anunsiyo ro posibleng delisting bangud sa indi makabig nga “poor” ukon pobre.
Nataeupangdan man nga kapin sa 30% hasta it 40% ro indi anay pagkakason sa nasambit nga programa.
Sandig man sa listahan it ahensya, umpisa ko Septyembre 5, 2022, kapin sa 187,613 household beneficiaries ro opisyal nga gindelist sa 4Ps.
Sa pihak nga parte pilang programa man it DSWD ro naga kinahangean it dugang nga pondo para sa 2023.
Sa presentasyon ni Sec Tulfo it andang proposed budget para sa masunod nga dag-on, gintumod kara ro Social Pension for indigent senior citizen, centenarian program ag supplementary feeding program nga kaeakip sa andang tier 2 ukon “wish list.”
Kinahangean sigon it P25.78 billion dugang nga pondo sa social pension matapos nga maging laye eon ro pension increase sa mga senior citizen maghalin sa P500 hastaP1,000.
Samtang, P196.775 billion ro naging kabilugan nga proposed budget it DSWD ag attached agencies kara para sa dag-ong 2023.
