KALIBO, Aklan — Nag-abot sa 11 nga mga hotels and resorts sa isla it Boracay ro nagpasakop sa gin-abangan nga bonggang fireworks display sa pagsug-aeaw it Bag-ong Dag-on.
Kada dag-on hay nagabueuligan ro lokal nga gobyerno it Malay ag mga hotels and resorts agud nga pahauman ro New Years countdown nga ginaeakipan it party by the beach ag ro enggrande ag mas maabu nga fireworks display.
Sa makaron nga dag-on hay 11 nga establisimento ro nakabo-oe it permit agud nga makapag-organisa it kanya-kanyang fireworks display.
Nasayuran nga dagsa ro mga turista sa Boracay, kun sa siin mas ginpili nga sa isla mag selebrar it Bag-ong Dag-on.
May kanya kanyang gimik ag aktibidad ro mga establisimento agud masiguro nga magiging memorable ro bakasyon it mga bisita.
Nauna eon nga ginpahayag it Malay Tourism Office nga base sa andang record naga abot eon sa 6,000 ro daily average it mga turista nga nagasueod sa Boracay.
Nagapakita sa andang datos nga nag abot eon sa 79,357 ro nagbisita sa isla umpisa Dec. 1 hasta 15.
Raya hay ginaeakipan it 63,240 nga local visitors, 15,182 nga foreigners ag 935 ro overseas Filipino workers.
