Kapin sa 165,000 ka mga onga sa Western Visayas ro uwa pa nabakunahan kontra measles ukon tigdas ag rubella, rason agud nga paeawigon it Department of Health (DOH) ro supplemental immunization campaign hasta Setyembre 4.
Base sa datos it DOH hasta Agosto 28, 242,865 ukon 59.5% pa eamang sa target nga 408,114 nga mga ongang edad an-om nga buean hasta 59 months ro nabakunahan halin kat nag-umpisa ro kampanya ko Agosto 10.
Pinakamataas ro vaccination accomplishment rate sa Iloilo province nga umabot sa 64.6%, ginsundan it Antique sa 61.9%, Guimaras sa 57.7%, Capiz sa 55.6%, Iloilo City sa 52%, ag Aklan sa 51.8%.
Suno sa mga health official, kaibahan ro measles sa mga pinaka-makataeapon nga sakit, samtang ro masaming reaksyon matapos ro bakuna kaparehas it eagnat, pagpanakit sa ginturukan ag sangkiri nga pantal hay masaming mild ag temporary eamang.
Ginlaygayan ro mga ginikanan nga bantayan ro andang mga onga matapos mabakunahan ag insigidang ipasayod sa health center kon makaeksperyensya it uwa ginaeauman nga medical reaction.
