KALIBO, Aklan — Nagpangayo it pasaylo sa publiko partikular sa miyembro it Kalibo Auxillary Police (KAP) nga si Irene dela Cruz ro daywa ka mga eaeaki matapos nga nag-viral sa social media nga Facebook ro andang gin-post ag gin-share nga litrato it KAP nga uwa it helmet samtang nagamaneho it motorsiklo.
Suno kanday Wendel Nagamos ag Gerald Moises nga uwa sanda nakasayod nga luma eon ro nasambit nga litrato nga nabueo eamang sa group chat ag gin-post sa andang kaugalingon nga account.
Katuyuan eamang kunta nanda nga mapasayod ro publiko nga ro nagapatuman it laye hay imaw man mismo ro nagaeabag kara.
Aminado sanda nga saea ro andang ginhimo nga tikang bangud nga nagtuga raya it kahuy-anan kay dela Cruz.
Ro insidente hay natabo ko Setyembre 23 sa kasagsagan it pagpanakop it mga awtoridad sa mga motorista nga padayon nga naga-eabag sa ordinansa.
Apang makaron eamang sanda nagpakita sa taeatapan it pulisya bangud man sa kakoeba ko andang ginhimo.
Sa pihak nga parte, naging emosyonal si dela Cruz kasunod it pagpangayo it public apology it daywa bangud nga inde eon maibalik it andang pagpangayo it pasaylo ro gintuga nga kahuy-anan kana sa nasambit nga Facebook post.
Maabo sigon imaw nga nababaton nga negatibong komento ag pagpamaeag bukon eamang it sa social media kundi maging sa personal samtang imaw hay nagatrabaho.
