KALIBO, Aklan— Nagpangatubang sa kasong pag-eabag sa Anti-smoking ordinance it Local Government Unit (LGU)-Malay ag Resistance and disobedience upon agent of authority ro daywang Latvian national matapos umaktong arogante sa atubadngan it mga pulis kat sitahon ro mga raya samtang nagapanigarilyo sa binit it baybayon sa Isla it Boracay.
Gin-aresto it Malay PNP sanday Klavs Skevis, 26 ag Marats Prieas, 26 parehong taga-Latvia ag presenteng nagabakasyon sa sikat nga Isla.
Sa imbestigasyon it Malay Police Station, samtang nagarobing sigon ro mga beach patrollers it pulisya hay nataeopangdan nanda ro daywa nga hilong eon, nagahithit pa it sigarilyo ag nag-ihi sa ginabawaeang lugar rason nga insigida nandang ginsita.
Apang, uwa sigon nagpaawat ro mga turista ag arogante pang nagsabat sa mga pulis rason nga insigida nandang ginbitbit ag gindaea sa taeatapan it pulisya kon siin sanda ginkulong para sa nagakaigong disposisyon.
Nasayurang hugot nga ginabawaean sa uman nga pagbukas it Boracay ro pagpanigarilyo ag pag-inom it aeak sa beach front ag maging sa mga pampublikong lugar.
