KALIBO, Aklan — Kulong ro sangka 45-anyos nga mekaniko matapos madakpan nga nagabaligya it ginadudahan nga shabu sa Purok 6, C. Laserna St. Kalibo, agahon it Martes, Setyembre 10, 2024.
Sa ginpatigayon nga buy-bust operation it Provincial Drug Enforcement Unit ag Kalibo Municipal Police Station, nadakpan si Emmanuel Ledesma, alyas ‘Jun’ sa nasambit nga lugar matapos magbaligya it sangka sachet it ginadudahan nga shabu nga nagabalor it P7,000 sa sangka police asset.
Ginasugid nga residente raya it Brgy. Andagao, Kalibo ag nakipag transaksyon eamang sa nasambit nga lugar.
Mag-eowas sa ginbaligya nana nga iligal nga droga, nabo-oe pa ro sangka sachet it ginadudahan nga shabu, pilang sachet nga may residue it ginadudahan nga droga, drug paraphernalia, daywang ka cellphone ag iba pang non-drug items.
Sa pag-body search kana , nakita sa sueod it anang suksok nga underwear ro nakasutsot nga sangka blue nga underwear it sangka babaye.
Nakaangkon it pilang gasgas sa tuhod ag dahi ro suspek matapos nga magsukoe sa mga awtoridad nga nag-aresto kana.
Si Ledesma hay una sa street level target list it banwa.
Nakulong imaw sa kaparehong kaso ko 2016, apang nakahilway ko 2018 pinaagi sa plea bargaining agreement.
Nasayuran nga haeos tatlong buean man ro pagsubaybay kana it mga awtoridad antes nga ginkasa ro operasyon.
Nagapangatubang imaw sa reklamong pag-eabag sa Comprehensive Dangerous Drugs Act of 2002.
Samtang, nagapabilin nga kipo ro bibig it suspek angot sa pagka-aresto kana.
