KALIBO, Aklan–Ginklaru it sangka hog raiser nga bukon it African Swine Fever (ASF) ro naging rason it pagkamatay it haeos 28 nga mga baboy ko nagtaliwan nga buean it Abril sa Sitio Hagakhak, Brgy. Baybay, Makato.
Suno kay Mrs. Luzviminda Torrefiel, residente it nasambit nga lugar nga bukon it imaw ro nagapanag-iya it nasambit nga mga namatay nga baboy sa baylo hay gin-rentahan eamang ro anang mga tangkae.
Ro pinakarason sigon it pagkamatay it mga orok hay tuga it drug overdose matapos nga ginpa-inom it pampurga sa saea nga pamaagi.
Samtang, tatlong adlaw makataliwan ro insidente, gin-usisa it Department of Agriculture Makato ro natabu ag ginkumpirma nga owa it anuman nga sintomas nga namatay sa ASF ro mga alagang baboy.
Ro sambilog nga survivor sa 29 nga mga orok hay nagapabilin nga mabaskog.
Ro mga namatay nga orok hay insigidang gin-eubong.
Sa pihak nga parte, ginkumpirma man ni kagawad Molot Torrefiel it nasambit nga lugar nga namatay man ro anang mga alagang baboy nga ginaeakipan it tatlong nayon nga puro nabdos ag kabilugan nga 16 nga orok.
Ro cause of death it nayon hay ro pagkamatay it mga orok kara samtang sa sueod it tiyan.
Apang nataeupangdan sigon nana nga ro anang mga orok nga namatay hay matsa may mga ginsugdan it namok.
Gin-report man sigon nana ro insidente sa DA-Makato ag nagpatigayon it imbestigasyon.
Mag-eowas sa anang mga alagang baboy, ginasugid nga maabu pang insidente it pagkamatay it baboy sa andang lugar.
