KALIBO, AKLAN — Nagapadayon ro imbestigasyon it mga pulis sa nag-eontad nga pagpamaril it riding-in-tandem sa sangka peryahan nga ginkamatay it tatlo ag ginkanina it daywang iba pa sa Brgy. Camanci Norte, Numancia, Aklan.
Patay sanday Walter Rembulat, 42; Rogelio Saron, 56, ag Jeconi Isidro, 35, puro mga barangay tanod ag residente it nasambitang lugar bangud sa gin-angkon nga tama it bala sa nagkaeain-eain nga parte it eawas gamit ro .45 kalibre nga baril.
Samtang, naninahan man ro sambilog pang tanod nga si Danilo Villorente, Jr., 43, ag Francis Eladia Salibio, 9, nga gintamaan it ligaw nga bala.
Base sa report it Numancia Police Station, matapos barilon it uwa pa nakilaeang suspek si Rembulat hay insigida raya nga nagpaeagyo sakay it nakabantay nga motorsiklo, apang naeagas ag nakuyog raya it iba pang tanod sa lugar kon sa siin nahukas ro ginasuksok kara nga bonnet.
Insigidang naka-resbak ro kasabwat nga driver kabangdanan nga gintamaan ro tatlo pang tanod ag sangka ongang babaye.
Nagpaeagyo ro mga raya sa inde matumod nga direksyon.
Ginaimbestigahan pa it mga pulis ro motibo sa krimen ag pagkakilan-ean it mga suspek.
