KALIBO, Aklan—Patay ro sangka 34-anyos nga mangunguma matapos nga gin-eabo it makapilang beses sa Enriquez Road, Brgy. Estancia, Kalibo.
Ginkilaea ro biktima nga si Rogene “Negro” Pelante samtang ro suspek hay ginkilaea man nga si Ghent “Jojo” Ratay, 33-anyos ag parehong residente it nasambitang lugar.
Suno kay Ratay, samtang nagagahit imaw it eanas hay makapilang beses sigon imaw nga gin-ayat it inaway it biktima kon sa siin sa anang unang pag-ayat hay ginpasensyahan anay nana raya.
Apang sa pagbalik sigon kara hay gin-ayat imaw it uman kon sa siin napuno eon man sigon imaw sa biktima rason nga ana raya nga gin-eabo gamit ro sanduko.
Ginpahayag dugang ni Ratay nga bukon eamang it raya ro unang kahigayunan nga gin-ayat imaw it inaway it biktima kundi maabo eon man nga kahigayunan ag bangud sa kaakig hay nahimo nana ro nasambit nga krimen.
Matapos sigon it insidente hay ana nga gin-aywanan ro biktima nga nagahamyangon sa eotay nga may lastro sa tangkugo ag eantas ro tu-o nga lima ag nagsurender sa konsehal it barangay.
Nagnueo man sigon imaw sa anang ginhimo nga krimen apang sobra-sobra eon ro ginapaagi kana it biktima.
Batunon eon lang sigon nana kon anu ro kaso nga igapasaka it pamilya kontra kana.
