KALIBO, Aklan—Ap-at nga eaeaki ro gin-aresto sa isla it Boracay matapos ro pagpatindog it istruktura sa forest land sa nasambit nga lugar, nga sangka pag-eabag sa Presidential Decree 705 ukon Revised Forestry Code of the Philippines.
Suno kay Rizaldy Rivera, Special Investigator it National Bureau of Investigation (NBI) Environment Crime Division nga ginpangunahan it ahensya ro pag-aresto kanday Dhelmar Evangelo, 29-anyos ag Gerald Alapag, 29-anyos parehong residente it Brgy. Yapak; kamana man sanday Mark Bernard Alcantara, 42-anyos ag Ludwig August Borchers, 69-anyos parehong residente it Brgy. Balabag pasado alas-5:00, hapon it Martes.
Ko nagtaliwan nga dag-on, napueo nga katawo man kaibahan ro ap-at nga dumueo-o ro gin-aresto it NBI sa owa pagsunod sa ginpagguwa nga show-cause order it Department of Environment and Natural Resources (DENR) sa kaparehong pag-eabag.
Nasayuran nga naga-abot sa 800 istruktura sa isla ro nag-eabag sa Revised Forestry Code of the Philippines, ro laye nga nagabawae sa pag-okupa, pagpatindog it istruktura ag iba pang hilimuon sa mga kagueangan.
