Nag-abot sa 539 nga pamilya it mga biktima it gina-alegar nga extrajudicial killings (EJK) ro nag-apply bilang “participating victims” sa kaso kontra kay dating Pangueong Rodrigo Duterte sa International Criminal Court (ICC).
Tuyo kara nga maipaabot ro andang panan-awan sa proseso it pagbista.
Suno kay ICC Assistant to Counsel Atty. Maria Kristina Conti, indi eon kinahangean nga magtestigo sa korte ro mga raya bangud nga separado sanda sa mga testigong pagapili-on it Prosecution ag Defense.
Sakop eamang it kaso ro mga insidente umpisa Nobyembre 2011 hasta Marso 2019.
Dugang pa ni Conti, pwedeng magtau ro ICC it konsiderasyon kay Duterte, kaibahan ro pagpasakop sa hearing pinaagi sa video call.
Posibleng maga-umpisa ro pagbista sa sueod it makaron nga dag-on.
Nauna eon nga ginpabakog it ICC ro hurisdiksyon kara ag ginkumpirma ro mga kaso kontra kay Duterte angot sa crimes against humanity, kaibahan ro murder ag attempted murder, nga gina-alegar nga kaparte it maeapad at sistematikong pag-atake kontra sa mga sibilyan.
