KALIBO, AKLAN – – – Sangka 54 anyos nga misis ro naboe-an it cash nga kapin sa 18,000 pesos matapos nga umatake ro grupo it salisi gang sa Ibajay Public Market.
Nagdangop sa Police Station ro biktimang si Divina Soguillon, residente it Brgy. Bugtong Bato, Ibajay.
Base sa report, samtang nagapanindahan hay ginasinundan raya it daywang menor de edad ag sa indi masayuran nga pamaagi hay natigayon nga mabo-oe ro anang pouch it sangka eaeaki nga may sueod nga kwarta.
Ginpasa-pasahan sigon ro anang pouch it mga suspek.
Sa mayad nga swerte hay nadakpan ro mga suspek nga sanday Mark Anthony Rosales, 27 anyos ag Ruby Rosales, 36 anyos ag parehong residente it Tondo, Manila.
Apang, padayun pa nga gina-usoy it mga otoridad ro daywang menor de edad nga gina-alegar nga kasabwat it daywang naaresto.
Nagapadayun hasta sa makaron ro imbestigasyon it mga pulis sa insidente.
