NATIONAL News — Kapin sa 700 nga centenarians ukon mga naga edad it 100-anyos pataas ro owa pa nakabaton it P100,000 nga cash gift halin sa Department of Social Welfare and Development.
Naeakip sa waitlisted ro mga nasambit nga senior citizen matapos nga akuon it DSWD nga owa it gintaeana ro Department of Budget and Management nga dugang nga pondo para sa cash gift.
Sa pag-atubang sa House Special Committee on Senior Citizens Organizational Meeting, ginpahayag ni DSWD director for Program Management Bureau Maricel Deloria kaibahan sa andang ginabayaran makaron nga dag-on ro mga una sa waitlisted ko nagtaliwan nga dag-on.
Suno kay Deloria, pinaka-maabung waitlisted hay halin sa Ilocos region, 120 beneficiaries; Western Visayas, 116; Central Visayas, 110 ag NCR, 45 beneficiaries.
Nagsumite eon sigon sanda it request para sa dugang nga pondo sa DBM ag ginahueat eon nanda ro sabat kara.
