KALIBO, Aklan— Pangkabilugang naging matawhay ro ginpatigayong opening salvo it Kalibo Sto. Niño Ati-atihan festival 2019 nga ginbansagang “The Mother of All Philippine Festival” kahapon nga adlaw it Biyernes.
Raya ro ginpahayag ni P/CInsp. Richard Mepaña it Kalibo Police Station sa interview it Bombo Radyo Kalibo.
May kaangtanan kara, eubus ro anang pasaeamat sa tanan nga mga stakeholders ag PNP personnel sa hugot nga pagbantay sa nasambitang selebrasyon.
Uwa suno kana it mga maeagkuang insidente nga nag-eontad mag-eowas eon lang sa inde malikawan nga pag-ilinitan it pilang ka mga pamatan-on nga nagresulta sa pagbaeaywan.
Nauna eon kara nga ginpasakupan it kapin sa 63 ka mga tribu ag grupo ro ginbansagang “tamboe sadsad” nga nag-arangkada sa mga nagapangunang karsadahon sa banwa it Kalibo.
Naging bisita man sa Kalibo Pastrana Park ro “dekalibreng” kontrabida nga si Katrina Halili ag ginpakilaea sa nasambitang programa ro 16 ka mga gwapahong finalists it Mutya it Kalibo 2019.
Ro nasambitang festival hay ginadayo it mga deboto ni Sr. Sto. Niño ag maging ro mga dumueoong halin sa nagkaeain-eain nga lugar sa bilog nga kalibutan nga magabuhay hasta sa buean it Enero.
