KALIBO, Aklan — Gintaw-an it pasado nga grado nga 85% halin sa passing grade nga 70% it validation teams it Department of Interior and Local Government (DILG) ro lokal nga gobyerno it Malay sa pagtapos it deadline ko Setyembre 29 para sa ginmandu nga clearing operations.
Suno kay acting Malay Mayor Frolibar Bautista nga hasta sa makaron hay nagapadayun ro andang paglimpyo ag pagbo-oe sa tanan nga road obstructions sa andang nasakupan.
Samtang, sa isla it Boracay suno kana hay indi maipatuman ro clearing operations bangud sa nagapadayun nga rehabilitasyon it mga karsadahon .
Gindugang pa ni Mayor Bautista nga kinahangean nga ma-sustain ro naumpisahan nga paglimpyo rason nga nag-apela imaw sa publiko ag mga motorista nga magbuylog ag sanda mismo ro magkakas it mga bagay-bagay, istraktura, ukon iba pang kagamitan nga nakasab-eag sa karsada .
Nasayuran nga pagataw-an it show cause order ro mga LGUs nga indi magasunod sa mga sueundanan it DILG angot sa road clearing nga igasumite kay Pangueong Rodrigo Duterte.
Samtang, sigidas man makaron ro pagdakop it LGU-Malay sa mga motorsiklo nga ginapalusot sa isla nga owa it nagakaigo nga permit to transport.
Haeos daywang buean eon sigon ro andang operasyon ag maabu eon ro na-apprehend ag natiketan.
