KALIBO, Aklan — Gina-abangan makaron nga adlaw it Liberal Party ro igapatawag nga pueong ni Pangueong Rodrigo Duterte kaibahan si Vice President Leni Robredo agud nga talakayon ro magiging papel kara sa ginbilog nga Inter-Agency Committee on Anti-Illegal Drugs (ICAD).
Raya ro ginhambae ni Liberal Party vice president for external affairs Erin Tañada sa interview it Bombo Radyo Kalibo matapos nga pormal eon kara nga ginbaton ko Miyerkules nga adlaw it bise presidente ro pag-appoint kana bilang co-chairperson it nasambit nga komite.
Padayun sigon sanda nga nagakabaeaka sa LP nga posibleng gamiton eang si Robredo nga panakip-butas engkaso nga mapas-eawan ro war on drugs ni Duterte eabi pa ag matunog ro pangaean it bise presidente nga magapadaeagan sa nagahilapit nga presidential elections.
Samtang, umapela man it pangamuyo si Tañada nga mabuytan it maayos ni Robredo ro anang trabaho bangud nga mabahoe sigon nga hangkat ro pagsukoe sa anti drug war campaign.
