Kalibo Aklan ———-Nagapabilin nga asymptomatic ukon uwa it sintomas ro mag-asawa nga Locally Stranded Individual (LSI) nga nagpositibo sa COVID-19.
Suno kay Libacao Municipal Health Officer Dr. Aldrinne Fernandez, ro mag-asawa hay nag-abot sa Caticlan port halin sa Tondo, Manila ko July 21 it gabie kon sa siin ko July 22 it agahon eon sanda ginsueang it transport vehicle ag insigidang gindaea sa andang identified nga baeay nga kon sa siin sanda magapaidaeom sa home quarantine.
May kaangtanan kara, oras-oras ro monitoring kanda it Barangay Health Emergency Response Team (BHERT’s) kon sa siin nakaangkon sanda it sintomas it COVID -19 makataliwan ro pilang adlaw.
Bangud kara, gilayon nga ginbueo sanda it Municipal Health Officers ag gindaea sa Ligtas COVID Center ag ginpaidaeom sa RT-PCR test kon sa siin ko July 30 hay nagguwa ro resulta nga positibo sanda sa makataeapon nga sakit.
Apang sa pihak kara, ginduea ni Dr. Fernandez ro kabaeaka ag kahadlok it mga pumueoyo bangud nga nagapabilin sa LCC ro mag-asawa ag inde sanda makaguwa hasta nga inde matapos ro quarantine period kamana man kon inde masiguro nga uwa eon sanda it COVID infection.
