Kalibo Aklan ——–Ginkasubo it Sangguniang Bayan it Malay ro naging tikang it banwa it Makato nga pagkondena sa andang ordinasa nga pagpasaka it environmental fee sa mga Aklanon nga nagasueod sa Isla it Boracay.
Suno kay Malay Sangguniang Bayan member Neneth Aguirre-Graf, owa sanda naila sa termino nga gingamit it mga miyembro it Sanguniang Bayan it Makato nga matsa ginakondena ro andang ordinansa.
Sandig sa proposed Municipal Ordinance No. 414 series of 2020, halin sa presenteng 75 pesos nga environmental fee hay posibleng magtaas raya it 300 pesos para sa foreign tourist, 150 pesos sa domestic tourist ag maging ro mga Aklanon nga bukon it residente it banwa it Malay hay magabayad it 50 pesos.
Nasayuran nga ko nagtaliwan nga dag-on eamang ginpatuman it LGU-Malay ro 75 pesos nga panueoktan sa environmental fee halin sa 50 pesos, kon sa siin ginsuportahan raya it Department of Environment and Natural Resources (DENR) agud mapabilin ro rehabilitasyon nga ginahimo sa Isla.
Nasayuran nga aprubado eon sa pangatlo ag ulihing pagbasa it Sangguniang Bayan it Malay ro nasambit nga ordinansa.
Samtang, sa pihak nga parte, ginpabutyag man ni Sangguniang Panlalawigan member Atty. Harry Sucgang nga sa sueod it 30 diyas hay pagatalakayon nanda ag maid-id paga-estudyuhan ro ordinansa nga ginpasa kanda it Malay.
Aminado man si Atty. Sucgang nga malisod nga ipatuman ro gustong matabo it bawang Malay para sa Isla eabi eon makarun nga nagapangatubang ro nasyon kamana man ro bilog nga kalibutan sa krisis nga daea it Coronavirus Disease ukon COVID-19 pandemic.
Samtang, nakadepende sigon sa andang magiging diskusyon sa Sangguniang Panlalawigan ro desisyon kung mapasugtan raya ukon indi.
