Kalibo Aklan ——-Obligado eon ro tanan nga mga nagasueod sa probinsiya it Aklan nga makabo-oe it Online Health Declaration Card QR Code .
Raya ro ginpahayag ni Mr. Jeffrey Jizmundo, Head it Operation and Warning Section it Provincial Disaster Risk Reduction and Management Office (PDRRMO-Aklan).
Suno kana nga raya hay sandig sa ginpaguwa nga Executive Order No. 035 ni Aklan Governor Florencio Miraflores nga nagatuyo nga maprotektahan ro probinsiya nga makaangkon it local transmission it coronavirus disease 2019 (COVID-19).
Ro implementasyon kara hay naging epektibo ko Agosto 19, 2020.
Nasayuran nga padayun ro pagtinaas makaron it kaso it nasambit nga sakit sa mga kaiping nga probinsiya it Capiz, Iloilo ag Negros Occidental.
Ginpahayag dugang nga ro nasambit nga tikang hay bilang preparasyon man sa uman nga pagbukas it Isla it Boracay sa mga dumuueuong nga turista .
Napamatud-an eon man suno kana ro pagiging epektibo kara sa ginpatigayon nga contact tracing sa mga nakasalamuha it mga nailistang nag-positibo sa COVID-19 nga mga Aklanon .
Ginpaathag ni Jizmundo nga ro nasambit nga Online Health Declaration Card QR Code hay ginapakita sa mga paga-agyan nga borders pasueod sa Aklan.
Ro Border Management Procedure para sa mga pribado ag mga delivery vehicles.
1. Mag-agto sa aklan.gov.ph or aklan.balikbayan.gov.ph ag i-click ro Online Health Declaration Card
2. Pil-apan ro tanan nga mga ginapangutan ag i-click ro Submit. Hueaton ro confirmation nga may kaibahan nga QR code
3. I-save ro kopya it QR sa inyong mga smart phone ukon makaangkon it printed nga kopya kon nagagamit it computer
4. Ipakita ro QR code it inyong Health Declaration Card sa mga otoridad sa border para sa scanning
para man sa mga pampublikong transportasyon:
1. Kinahangean nga magtau ro Drivers ukon Conductors it printed nga Health Declaration Card sa tanan nga mga pasahero nga nagapa-agto sa Aklan
2. Kinahangean nga sueatan ukon pil-apan it pasahero ro tanan nga mga ginapangutana
3. Pagkatapos hay itau it pasahero ro na-pil-apan nga Health Declaration Card sa Aklan Border Personnel nga magasaka sa saeakyan pag-abot sa Provincial checkpoints.
Samtang, ginahinyu man it Provincial Government makaron ro bulig it mga computer shops sa mga customer nga gustong magbo-oe it Health Declaration Card.
Pwede man sigon nga mag-proseso kara sa mga border checkpoints, apang medyu mabuhay ro pagpila sa encoding.
Sa pihak nga parte, nagpaandam si Jizmundo nga medyu mabudlay makaron nga makasueod sa website nga aklan.gov.ph bangud sa ginahimo nga pag-update ukon system maintenance it DICT , kun sa siin ginatinguhaan makaron nga maibalik sa mas madali nga tiempo.
Engkaso nga makaexperiensiya kara hay mag-agto lang sa facebook page nga Aklan Province ag magderetso sa link paagto sa online health declaration.
