Kalibo Aklan———Sambilog ro patay samtang sambilog ro ninahan sa sunggaban it daywang ka motorsiklo sa Brgy. Lupo, Altavas.
Base sa report, ginkilaea ro binawian it hueam nga kinabuhi nga si Ronel Andres, 26-anyos, residente it Brgy. Igang, Jamindan, Capiz samtang ro motorista kara nga nakasunggaban nga nakaangkon it pagkabali it waea nga pa-a hay ginkilaeang si Dante Pareño, 26-anyos ag residente it nasambitang lugar.
Base sa imbestigasyon it pulisya, nagamaneho it anang motorsiklo si Andres paadto it banwa it Altavas kat gulpi eon lang nga maadto sa anang daean ro ginamaneho nga motorsiklo ni Pareño rason nga nasunggaban ro daywa.
May kaangtanan kara, parehong sumemplang sa karsada ro daywa ag nakaangkon it nagkaeain-eain nga kasakitan ag lastro sa eawas.
Nadaea pa ro daywa sa Altavas District Hospital apang ginbawian it hueam nga kinabuhi si Andres makataliwan ro pilang oras samtang si Pareño mat-a hay ginrefer sa Aklan Provincial Hospital para sa nagakaigong medikasyon.
Ro nasambitang aksidente hay padayon pang gina-imbestigahan it pulisya.
