KALIBO, Aklan—Temporaryong ginsuspende it banwa it Altavas ro pagbaton it mga naga-uli nga Locally Stranded Individuals (LSIs) umpisa kahapon, Disyembre 16 hasta Enero 04, 2021.
Sandig raya sa ginpasa nga Sangguniang Bayan (SB) Resolution No. 356-12-2020 ag Executive Order No. 048 series of 2020 nga ginpagguwa ni Altavas Mayor Denny Refol Jr.
Nauna eon nga nagpagguwa it tagsa-tagsang Executive Order ro banwa it Buruanga, Malay ag Numancia angot sa pagsuspinde sa pagbaton it mga LSI ag Returning Overseas Filipinos (ROFs) matapos nga maabot eon ro maximum capacity it andang mga facility quarantine ag mataw-an it kahigayunan nga makapahuway ro andang mga healthcare workers.
Sa makaron hay naga-abot eon sa kabilugan nga 375 ro nailistang kaso it Coronavirus Disease 2019 ukon COVID-19 sa probinsya it Aklan kung siin 63 pa ro nagapabilin nga active cases samtang 300 eon ro mga nakarecover ag 12 ro namatay.
