KALIBO, Aklan—Nakasugtanan sa ginpatigayun nga special session it Sangguniang Bayan it Kalibo nga amyendahan ro pilang porsyon it ordinansa nga nagatao it otoridad kay Mayor Emerson Lachica sa pagbakae it eugta nga paga-ubrahon nga relocation site it mga vendors sa Kalibo Public Market.
Sa botong 5 YES ag 4 NO hay nagdaog ro oposisyon para maduso ro pag-amyenda it nasambit nga ordinansa.
Raya hay matapos nga owa sanda nagapabor sa presyo it pagabak-eon nga lote sa J. Martelino St., Brgy. Andagao, Kalibo.
Dugang pa kara nga bukon sanda it pabor nga ro munisipyo ro magbayad sa expenses it pagabak-eon nga lote.
Dapat sigon nga ro seller ro magasabat it anuman nga baeayran.
Sa pihak kara, suportado sigon nanda ro pag-utang ukon loan it lokal nga gobyerno para ibutang sa mga proyekto it banwa mag-eowas eamang sa pag-purchase it eugta.
Nakasugtanan man sa special sesyon nga maghimo it sangka resolusyon nga bawion ro otoridad nga gintao sa alkalde nga magbakae it lote.
Samtang, ginpaathag man si Sangguniang Bayan member Augusto Tolentino nga gusto kara nga sundon eamang ro proseso rason nga nagpahayag imaw it owa pagpabor sa pag-amyenda.
Makabig suno kana nga illegal measure ro ginhimo nga pagpasa it konseho it pilang ordinansa ko Abril 8 sa andang ginpatigayun nga special session.
Ro ordinansa suno kana nga ginpasa sa special session hay indi eon pwedeng dugangan pa.
