Olympic trivia — Sa kauna-unahan nga kahigayunan sa kasaysayan it Philippine sports, mas maabu nga babayeng atleta ro magapasakop kaysa sa mga eaeaki sa Olympic delegation.
Napueo sa 19 nga atleta it Pilipinas nga magapakitang gilas sa Tokyo Games hay puro mga babaye. Ro dating record hay ko 2000 Sydney Games kat siyam sa 20 nga Philippine athletes hay mga babaye.
Nasayuran nga si US Women’s Open champion Yuka Saso ro magiging kamanghuran ukon pinakabata sa mga atleta matapos nga naga-edad pa eamang imaw it 20 anyos ko nagtaliwan nga Hunyo 20.
Pila pa sa mga batang atlate hay sanday Carlos Yulo it gymnastics nga naga edad it 21 ag Cris Nievarez it rowing samtang si Margielyn Didal it skateboarding ag Kurt Barbosa it taekwondo hay parehong 22 anyos.
Sa pihak nga parte, ro mga may edad eon nga atleta sa Philippine delegation hay ro pro golfer nga si Juvic Pagunsan. Ro 2021 Asia Pacific Diamond Cup champion sa Japan Golf Tour ro makabig nga ‘kuya’ it tanan matapos nga naga-edad eon imaw it 43 anyos ko Mayo 11.
Pila sa mga atleta hay gina-enjoy eon ro makabig nga home court advantage bangud mag-eowas nga familiar eon sa mga pasilidad hay may kaangtanan sanda sa host country nga Japan.
Sanday Yuka Saso ag Juvic Pagunsan hay regular nga nagapasakop sa Japan Golf Tour ag kaeabanan nga nagahampang it pilang dinag-on eon sa Japan.
Samtang si Carlos Yulo hay nag-training sa Japan umpisa ko 2016 sa idaeum it gymnastics coach nga si Munehiro Kugimiya, samtang si Kiyomi Watanabe hay gin-mentor man ni dating Asian Games judo gold medalist Yuta Yakazi.
Sambilog sa mga Philippine athletes nga magaselebrar it anang kaadlawan sa katung-anan it anang Olympic campaign hay ro pambato it nasyon sa women’s flyweight nga si Irish Magno nga maga-30 anyos eon sa Hulyo 27.
