KALIBO, Aklan—Bukon it kumbinsido ro sangka aklanon nga coach sa hampang nga boxing sa ginpakita nga abtik it pambato it Pilipinas sa women’s boxing nga si Nesthy Petecio sa nagapadayun nga Tokyo Olympics 2020 “the greatest show on earth”.
Raya hay sa pihak it pagkaangkon ni Petecio it silver medal matapos nga piyerdihon it pambato it Japan nga imaw ro nag-uli it bueawan nga medalya.
Suno kay coach Kris Indemne nga grabe ro ginpakita nga ka-abtik ni Petecio sa pre-lim ag semifinals, apang kat final eun hay medyo owa nag-epekto ro ginturo kana nga strategy it anang coach agud nga maipatumba ro anang kontra.
Dapat man sigon suno pa kana nga tudo-bigay eun ro sangka atleta ag indi pagtaw-an it kahigayunan ro anang kontra pag-abot sa final agud indi makueangan sa oras para maangkon ro kadaeag-an.
Samtang, naging alas man sigon it pambato it Japan ro home court advantage.
Samtang sa pihak nga parte may pagpadumdom man si coach Indemne para sa pambato man it nasyon sa men’s boxing nga si Eumir Marcial nga nakataeanang magahampang hin-aga nga adlaw it Huwebes.
Suno kana nga dapat hay indi sa gihapon raya magpakampante ag itao ro tanan agud nga mapanami ro anang scoring.
Sasayuran nga si Marcial hay sigurado eun nga maka-uli it bronze medal sa nagapadayun sa gihapon nga Tokyo olympics 2020.
Samtang sa pihak nga parte dapat man sigon nga maging mas aggressive pa si Carlo Paalam sa anang masunod nga pag-atubang sa semifinals.
Bangud sa pambato it Japan ro anang magiging kontra para sa silver medal hay dapat nga indi sigon raya magpakampante.
