KALIBO, Aklan—Nagapati ro Malay Sangguniang Kabataan (SK) Federation nga dapat tutukan it Department of Education (DepEd) nga mapabaskog ro pagtinueon-an sa idaeom it distance learning kasunod it pagbukas it School Year 2021-2022 sa idaeom it distance learning sa ikaywang kahigayunan.
Aminado si Ms. Christine Hope Pagsuguiron, SK Federation President it Malay nga maabo gihapon nga mga ginikanan ag estudyante ro gustong maibalik ro face to face classes.
Mabahoe sigon nga hangkat ro ginapatuman nga blended learning sa tunga it pandemya bangud sangkiri eamang ro matun-an it mga inunga kumpara kun sanda hay una mismo nagatuon sa eskwelahan.
Maabo man sigon nga estudyante sa kolehiyo ro nalisdan nga magtuon pinaagi sa online classes bangud mabudlay para kanda nga mag-execute eabi eon ro mga kursong nagakinahang-ean it personal nga inter-aksyon.
May kaangtanan kara, dapat sigon nga maging haum ro education sector engkaso nga mapasugtan ro face to face classes sa tunga it pandemya.
Suno kay Pagsuguiron dapat siguraduhon it DepEd nga fully vaccinated ro parehong mga learners ag manugturo kamana man nga preparado ro mga pasilidad kapareho sa ibang nasyon kung siin may plastic wall barriers ro kada desk para ma-mintina ro physical distancing sa sueod it eskwelahan.
Dapat man sigon nga mataw-an it prayoridad it gobyerno ro pagbakae it pabakuna para madugangan ro mga naga-abot nga supply ag mas pang madapasig ro vaccination rollout.
