KALIBO, Aklan—Blangko sa gihapon ro Tibyog-Akean Batan chapter sa rason ni Batan Mayor Rodell Ramos sa kontrobersiyal nga pagsaylo kara sa grupo ni dating Kalibo mayor ag gubernatorial candidate William Lachica.
Suno kay Sangguniang Bayan member Eric del Rosario nga daywang adlaw antes ro pag-file it certificate of candidacy hay nag-agto si Ramos kay Aklan Governor Florencio Miraflores agud nga ipahisayod nga magahalin imaw sa andang grupo ag magapadaeagan bilang kongresista sa unang distrito it probinsiya.
Aminado si del Rosario nga ro anang desisyon hay eubus nga nakaapekto sa andang line-up it mga kandidato bangud nga masyadong sukod ro anang pag-ea-ong ag preparado eon ro tanan.
Gindugang pa kara nga owa gid sanda it anuman nga ideya nga maga-ober-da-bakod si ramos bangud nga pilang buean ro nagtaliwan hay kaibahan man imaw it andang pambato sa pagka-gobernador nga si Ibajay mayor Jo-en Miraflores nga nagalibot sa mga kabarangayan it Batan.
Sa pihak nga parte, personal sigon nga desisyon it mag-inang Jindra Demeterio ag adopted son kara nga si Bojic Demeterio nga magapa-ilihir sa nagahilapit nga eleksyon sa magka-away nga partido.
Si Jindra hay magapa-ilihir bilang batan mayor kaibahan ro anang running mate nga si ABC president Ric-ric Rodriquez it Cabugao, Batan kun sa siin maka-engkwentru nanda ro tandem nanday Michael Ramos, half brother ni rodel ag demeterio.
