KALIBO, Aklan—Mabahoe nga perwisyo makaron sa mga residente eabi eon sa mga mangunguma ro pagkalhit it sangkaterbang basura sa mga kasubuaan ag kaeanasan halin sa dump site nga nahamtang sa Brgy. San Isidro, Banga.
Suno sa sangka residente it Brgy. Venturanza, Banga, nag-abot eon sa pilang katangkihan nga sakop it banwang New Washington ro mga basura nga kaeabanan hay plastic.
Ginapatihan nga gin-anod raya matapos ro pagbubu it mabaskog nga uean ko mga nagtaliwan nga adlaw.
Ginasugid nga bangud sa pagbaha hay naguba ro pader sa nasambit nga dump site.
Sa pihak nga parte, ginpasiguro man ni Punong barangay David Torres it Brgy. San Isidro, Banga nga may ginahimo eon sanda nga aksyon para masolusyonan ro problema sa mga nagkalhit nga basura.
Sa kamatuoran suno kana hay may ginpadaea eon nga backhoe ro Municipal Engineering Office para ma-umpisahan ro paghakot sa mga basura.
Samtang, ro masobra P1 million sigon nga pondong nakataeana para sa dump site makaron nga dag-on hay gin-realign anay para magamit sa pag-ayos it nasamad nga pader.
