KALIBO, Aklan—Ginsuhestiyon ni sangguniang panlalawigan member ag 1st district congressional candidate Atty. Harry Sucgang sa mga botante nga magpili it tama ukon nagakabagay nga kandidato sa eleksyon sa masunod nga dag-on.
Suno kana nga makasueubo eamang nga maabu nga mga Pilipino ro nagapili it kandidato base sa popularidad, itsura, manggad, may mga anunsyo sa telebisyon ag radyo nga nagatalakay angot sa baratong pagkaon, libreng edukasyon ag iba pa nga pang engganyo sa tawo.
Kon makarondaya sigon ro baeasihan, indi makaeaum nga makaangkon it nagakabagay nga opisyal.
Kinahangean suno kay Atty. Sucgang nga tun-an it mayad ro kandidato ag ro anang plataporma de gobyerno.
Magtipon it dugang nga impormasyon angot sa kandidato.
Magboto sandig sa konsensiya ag bukon it bangud sa ginpanupod nga kwarta.
Sapat man sigon nga tun-an ro ikasarang ag kwalipikasyon it kandidato.
Ginpadumdum pa kara nga indi maduea-an it pageaum nga owa eon it mga matino nga kandidato nga gustong magserbisyo it tampad sa publiko.
