KALIBO, Aklan—Gintaw-an it punto it pamunuan it GF Rovero Merchandising, contractor it gina-repair nga provincial road halin sa banwa it Banga paadto it Libacao nga bangud sa pag-inuean ko mga nagtaliwan nga dominggo rason nga mas nagabuhay ro proyekto.
Suno kay Engr. George Rovero, tag-ana it GF Rovero Merchandising nga sambilog sa mga rason it mabuhay nga pagkahuman it karsada hay bangud phase by phase ro pag-ubra kara.
Mag-eowas kara, kinahang-ean pa sigon nanda nga magbuoe it clearance halin sa Provincial Engineering Office (PEO) antes nga magpatigayun it pagbuhos.
Indi man sigon pwede nga dali-dalion ro trabaho para masiguro ro kalidad ro proyekto.
Ginatinguhaan eon man suno kana it anang mga tawuhan nga matapos ro pag-repair sa mas madali nga tyempo.
Sa makaron, una eon sigon sanda sa phase 3 it proyekto.
Nagapati si Engr. Rovero nga sambilog sa mga rason it madasig nga pagkasamad it karsada hay ro pag-agi it mga daeagkuan ag overloaded nga behikulo.
Sa pihak nga parte, ginpasiguro man kara nga nagsunod sanda sa ginakinahang-ean nga sign board ag tarpaulin sa underconstruction nga karsada sa bahin it Brgy. Bacan, Banga.
Madumduman nga sangka police officer nga naka-assign sa Nabas Municipal Police Station ro binawian it hueam nga kabuhi kat maaksidente sa nasambit nga lugar ko gabi-i it Huwebes.
