KALIBO, Aklan—Kabulig it kapulisan, ginabantayan man it barangay peacekeeping action force it barangay Poblacion, Kalibo ro Kalibo pastrana park kontra sa krimen ag mga owa nagasunod sa health and safety protocols.
Suno kay Punong barangay Niel Candelario it Poblacion, Kalibo nga ginmandu nana nga hugut nga bantayan ro Kalibo pastrana park matapos nga kada gabi-i hay haeos buhos ro mga nagapamasyar sa nasambit nga lugar eabi eon kon week end.
Raya hay kasunod man sa pagpaidaeum sa aklan sa alert level 2 kun sa siin maskin ro mga menor de edad hay ginapasugtan eon nga magguwa.
May kahigayunan sigon nga nagasueod ro andang patrol sa sueod it plaza agud nga maggamit it megaphone nga nagapadumdum sa mga tawo nga mag distansiya sa kada isaea ag tamang pagsuksok it face mask.
Dugang pa kara nga may mga nailista pang kaso it covid 19 sa Kalibo rason nga importante ro pagsunod sa minimum public health standard agud nga malikawan ro eubusan nga pag abu eon man it mga matapnan ag magabalik sa dating pag instrikto.
