KALIBO, Aklan—Gintuman it mga pampasaherong saeakyan ro andang promisa sa mga commuters nga magapanaba eon it pamasahe umpisa makaron nga adlaw it Lunes.
Sa paglibot it Bombo News Team sa terminal it mga PUJ sa Eastern side, nakaangkon eon it pagbag-o sa pamasahe eabi eon sa biyaheng Libacao-Kalibo vice versa.
Halin sa dating 100 pesos hay naging 60 pesos eon ro sukot para sa 70% nga seating capacity.
Samtang, ginpahayag ni Leandro Lenciano, Chairman it Banga-Kalibo jeepney Transport Service Cooperative, halin sa dating 30 pesos hay ginpanabaan eon nanda sa 20 pesos ro andang panueuktan ag may discount nga limang piso sa mga estudyante , senior citizens ag PWDs.
Owa man sigon it may nagreklamo sa andang mga pasahero ag matsa naintindihan man ro andang sitwasyon.
Ro 70% nga seating capacity it mga PUJ suno kana hay ginaeakipan it 13 nga pasahero, 11 halin sa terminal ag daywa ro paga-pick-apon sa daean.
Samtang, makarondaya man ro ginpatuman nga patakaran it mga drivers sa parte it New Washington-Kalibo nga rota.
Sa pihak nga parte, ginkalipay man it mga commuters ro ginbag-o nga panueuktan.
Ginpaabot man ni Lenciano ro andang mabuhay eon nga problema nga pag-agaw it andang pasahero it mga tricycle nga biyaheng Poblacion Kalibo.
Kabay suno kana nga maaksyunan raya it Land Transportation Office ukon LTO aklan ag highway patrol group sa posibilidad nga makaangkon it dugang nga adjustment sa pamasahe kon madugangan ro andang mga pasahero.
