KALIBO, Aklan—Haeos sarado eon ro tanan nga mga establisyemento komerysal sa Toronto, Canada mag-eowas sa mga grocery store.
Raya hay matapos nga uman nga lumobo ro kaso it COVID-19 tuga it Omicron variant.
Suno kay Bombo International Correspondent Betsy Relente Naipaul it Toronto, Canada, ko nagtaliwan nga adlaw hay nakalista sanda it 16,000 nga kaso it COVID-19 ag napueo ro namatay.
Bangud kara, ginsaraduhan eon ro mga eskwelahan ag mas pang ginpabaskog ro pagbakuna sa mga unga nga naga-edad 5 hasta 11 anyos.
Maskin ro pagpaturok it booster shot sa mga fully vaccinated nga indibidwal hay gin-required eon it gobyerno.
Posible sigon nga magpatuman it lockdown ro gobyerno engkaso nga magpadayun ro pagtaas it mga kaso.
Sa makaron, food delivery eamang sa mga restaurant ro ginapasugtan bangud hugut anay nga ginabawaean ro pag-dine in kamana man nga kanselado ro mga international flights.
