KALIBO, Aklan—Umpisa Enero 14 hasta 31, makaangkon it pagbag-o sa banking hours sa pilang mga banko sa bilog nga probinsiya it Aklan bangud sa padayun nga pagtinaas it kaso it COVID-19 ag pagpaidaeum sa probinsiya sa Alert Level 3.
Suno kay Melrose Acaling, Presidente it Aklan Bankers Club nga nagpaguwa sanda it board resolution angot sa pagpatag-od it oras it operasyon it mga banko, apang nakadepende sa management kon raya hay andang pagasundon.
Base sa andang board resolution, ro mga banko hay pwedeng mag-operate it alas-9 it agahon hasta alas 2 it hapon.
Aggud nga makasigurado sa andang transaksyon ag indi maabutan it cut-off time, gin-abisuhan ni acaling ro kliyente it mga banko nga mag-agto antes ro alas-2 it hapon ukon makipag angot sa andang natungdan nga mga banko para sa dugang nga impormasyon.
Samtang, owa man sigon it ginbag-o sa andang patakaran ukon protocol antes nga makasueod sa banko partikular ro pag fill-up it contact tracing form , pagsuksok it face mask ag pag obserba it physical distancing.
