KALIBO, Aklan—Gina-enggayo it sangka batikan nga abugado sa Aklan ro publiko nga padayun nga magsunod sa ginapatuman nga soeundanan it gobyerno.
Suno kay Atty. Plaridel Morania nga maskin eabag sa layi ro pagpilit sa sangka tawo nga magpaturok it bakuna kontra covid-19 hay nagapati imaw nga raya ro makabulig makarun sa mga tawo agud nga mataw-an it dugang nga proteksiyon ro kaugalingon kontra sa makataeapon nga virus.
Sa sitwasyon sigon makarun nga ginapangatubang sa pandemya ro nasyon hay kinahangean nga obserbahan ro porsiyento it populasyon kung pila ro gustong magpabakuna ag ro mga nagapamaeabag man kara.
Dugang pa kara nga nagakadapat eamang nga tutukan ro may mataas nga porsiyento it populasyon kapareho sa programa it gobyerno nga covid-19 vaccination.
