KALIBO, Aklan—Haum nga magsabat si Punong Barangay Rafael Briones it Briones, Kalibo sa ginpadaea kana nga sueat it Municipal Planning Development Office (MPDO) matapos nga pasugtan kara nga mag-istar ro sangka pamilya sa pabaeay it National Housing Authority (NHA).
Aminado si Kapitan Briones nga gintaw-an nana it otoridad ro pamilya Villorente nga temporaryong mag-istar sa sambilog sa mga housing unit matapos nga maguba ro andang baeay kasunod it pagpanaeasa it bagyong Odette ko Disyembre 2021.
Ginsaysay it opisyal nga nagapangison nga nagdangop kana ro natungdan nga pamilya para magpabulig rason nga gintanyag kara ro bakanteng unit.
Nagpromisa man sigon ro Pamilya Villorente nga temporaryo eamang ro andang paggamit sa pabaeay ag sa oras nga uman sandang makapatindog it baeay hay paga-aywanan eon nanda raya.
Dugang pa ni Kapitan Briones nga matapos mawasak ro baeay it pamilya hay ginpahalin eon sanda it tag-ana it eugta.
Ro pamilya Villorente hay tumandok it banwa it Libacao ag temporaryo eamang nga naga-istar sa nasambit nga lugar.
