KALIBO, Aklan—Humampak eon sa 99 dollars and 50 cents ro presyo it Brent Crude Oil sa international market sa atubang it nagabinahoe nga posibilidad it pag-atake ag eubusang pagsakop it Russia sa Ukraine.
Raya eon sa makaron ro pinakamataas nga presyo it nasambit nga International Benchmark Crude sa nagtaliwan nga pitong dag-on nga posibleng sumaka pa sa masobra 100 dollars sa mga masunod nga adlaw.
Naga-abot man sa 96 dollars per barrel ro US West Texas Crude kumpara sa 92 dollars ko nagtaliwan nga dominggo samtang ro Dubai Crude nga gina-konsumo sa Asian Markets hay bumunae eon sa 90 dollars per barrel halin sa 87 dollars ko nagtaliwan nga dominggo.
Engkaso nga mauli sa giyera ro tensyon sa tunga it Ukraine ag Russia hay ginakabaeak-am nga lumobo pa ro presyo it krudo sa global market.
Ro Russia ro pinaka-mabahoe nga natural gas ag oil supplier it Europa samtang 10% man sa bilog nga kalibutan.
Nag-apela man ro Organization of the Petroleum Exporting Countries sa andang mga miyembro nga dugangan pa ro supply para masiguro nga bastante para sa global consumer.
