KALIBO, Aklan—Grabeng kalisod ro gina-antus makaron it sangka pamilya bangud sa indi pa matumod nga kondisyon it sangka 22-anyos nga daeaga sa Brgy. Mobo, Kalibo.
Base sa panaysayon ni Jose Elmar Teban, ama it nasambit nga daeaga nga haeos tatlong dag-on eon nga ginabatyag it anang unga ro kasakit tuga it nagtubo nga mabahoe nga bukoe sa anang uyahon.
Gindaea eon sigon nanda raya sa mga ospital ag klinika sa banwa it Kalibo apang owa man it naitao nga kongkretong findings ro mga nagtan-aw nga doktor.
Bangud kara, ginpakamayad nanda nga ipa-checkup sa Iloilo ro daeaga apang owa man it tul-id nga naging sabat mag-eowas sa ginpahayag nga may “tumor” ro pasyente.
Ginasugid nga owa it anumang sakit ro anang unga kat raya hay bata pa rason nga nakibot sanda kat amat-amat nga nagbahoe ro bukoe.
Ro una sigon nga ginbatyag it daeaga hay ro masami nga pagsakit it anang mata hasta sa raya eon ro naging resulta.
Bangud sa tuman nga kapigaduhon, owa eon uman nga nakabalik sa clinic ukon ospital si tatay Teban.
Nagpanawagan man raya it bulig sa mga tawo nga may mabinueawanon nga tagipuson nga kunta hay mabuligan sanda nga mapatan-aw sa espesyalista ro anang unga para mataw-an it nagakaigo nga medikasyon.
Sa mga gustong magbulig, pwede kamu nga mag-contact sa numero nga 09385237516.
