KALIBO, Aklan—Haum ro pamunuan it Banga-Kalibo Jeepney Transport Service Cooperative nga makaangkon it adjustment sa andang pamasahe apang bukon sigon sanda it pabor nga ipatuman ro 100% seating capacity sa Public Utility Jeepney (PUJ).
Suno kay Mr. Leandro Lenciano, Chairman it Banga-Kalibo Jeepney Transport Service Cooperative nga pabor sanda sa ginpagguwa nga Executive Order ni Aklan Governor Florencio Miraflores matapos nga ipaidaeom sa Alert level 1 ro probinsya apang indi nanda igapatuman ro full capacity sa andang mga unit.
Suno kana, posibleng ipanaog eon nanda sa P18 ro panueoktan sa mga regular nga pasahero sa multicab halin Kalibo paadto it Banga vice versa halin sa presenteng P20.
Samtang, padayun man sanda nga magatao it diskwento sa mga estudyante, senior citizen ag PWD.
Agud nga mapun-an ro andang pagbawas sa pamasahe, plano sigon nanda nga magdugang it sambilog hasta sa daywang ka mga pasahero.
Ginpahayag dugang nga haum sanda nga magsakripisyo para sa mga commuter bangud sambilog ro mga raya sa nagabatyag sa mabahoe nga epekto it sigidas nga pagsipa sa presyo it petrolyo.
