KALIBO, Aklan—Nagapabot ag gindayaw it sangka batikan nga abugado sa probinsya it Aklan ro pagpirma ni Pangueong Rodrigo Duterte sa layi nga magabag-o sa depinisyon it krimen nga statutory rape ag magataas sa sexual consent maghalin sa 12 paadto it 16 anyos.
Suno kay Atty. Plaridel Morania, masyado pang hilaw ro utok it 12 anyos kung igakumpara sa 16 anyos rason nga bukon pa ro mga raya it masyadong antiguhan sa pagbilog desisyon sa kabuhi.
Madumduman nga ginaprubahan it Senado ag House of Representatives ko Disyembre ro bicameral conference committee report angot sa proposed Ace Incrasing the Age for Determining Statutory Rape and other Acts of Sexual Abuse and Exploitation to Protect Children.
Tuyo it bag-ong ginpermahan nga Republic Act 11648 nga amyendahan ro RA 3815 ukon ro Revised Penal Code, RA 8343 ukon Anti-Rape Law of 1997, ag RA 7610 ukon ro Special Protection of Children Against Abuse, Exploitation, and Discrimination Act.
Sa idaeum it RA 11648 hay indi magkaangkon it criminal liability sa mga indibidwal nga may carnal knowledge it sangka indibidwal nga owa pa it 16 anyos kung ro agwat it edad sa tunga it magtimbang nga parte hay masobra sa 3 dag-on ag mapamatud-an nga “consensual, non-abusive, ag non exploitative.”
Ginapahayag man kara mga makabig ro mga unga , babaye man ukon eaeaki, nga exploited sa prostitusyon ag sa iba pang klase it sexual abuse kung makipaghieawas ro mga raya para sa kwarta, kita, ukon iba pang konsiderasyon ukon bangud sa pagpamilit ukon impluwensya it adult, sindikato, ukon grupo.
Gindugang man it Kongreso ro panibag-ong paragraph nga nagamando sa Department of Education nga ieakot sa basic education curriculum ro mga subjects nga may kahilabtanan sa kinamatarong ag proteksyon it mga pamatan-on angot sa nasambitang layi.
