KALIBO, Aklan—Sa uman nga pagpatigayon it bayanihan bakunahan, gin-engganyo it Provincial Health Office ukon PHO-Aklan ro mga pumueuyu nga obrahon nga prayoridad ro pagpaturok it booster shots.
Suno kay J-Lorenz Dionesio, vaccination manager nga raya hay matapos nga mataeupangdan nga kaabuan sa mga nakatapos it 2nd dose sa tanan nga age group hay owa eon nagbalik para sa booster shot.
Gindugang kara nga maabu sanda nga available nga nagkaeain-eain nga brand it bakuna nga sarang nga mapili-an agud nga mas pang mapabaskog ro immunity kontra sa covid 19 eabi pa ag gulpi eamang nga may nagatuhaw nga variants it deadly virus.
Ginpamilit pa kara nga nagakabagay nga magpaturok it 3rd dose ro mga senior citizens ag may comorbidities.
Dere-deretso suno kana ro operasyon it vaccination sites sa ACC gym para makatau it bakuna sa tanan.
Pwede suno kana ro walk-in sa mga gustong magpa-booster basta nga daehon eamang ro vaccination card.
Kaibahan sa andang ginataw-an it prayoridad makaron mag-eowas sa pagtau it booster shots hay ro pagbakuna sa mga inunga nga naga-edad it lima hasta onse anyos.
Base sa record it department of health, haeos 80% eon it target population sa aklan ro naturukan it 1st dose, 75% ro naka-2nd dose ag 10% eamang ro nakapa-booster shots.
