KALIBO, Aklan—Ninahan nga gindaea sa Aklan provincial hospital ro sangka eaeaki matapos nga gin-eabo it makapilang beses sa Brgy. Pampango, Libacao.
Nakaangkon it lastro sa ueo ag siki ro biktimang si Jayson Sonio, 27-anyos matapos nga gin-eabo it mga suspek nga sanday Reniegie Sison, 31-anyos ag Jose Ritas, sa legal nga edad ag parehong residente it nasambit nga lugar.
Sa inisyal nga imbestigasyon it Libacao PNP, sakay it motorsiklo ro biktima angkas ro anang manghod nga si Jayvee Sonio kon siin gulpi eamang sigon sandang gin-eambangan it daywa nga armado it talibong.
Pagkakita sigon ni Jayvee sa daywa hay nag-eompat eagi raya sa motorsiklo ag madasig nga nagdaeagan agud nga makapangayo it bulig rason nga si Jayson eamang ro naeab-an.
Naaresto si Sison apang si Ritas hay padayon pang ginatugis it pulisya para sa nagakaigong disposisyon.
Ro insidente hay padayon pang ginaimbestigahan it mga otoridad.
