KALIBO, Aklan–Nagsurrender sa broadcast center it Bombo Radyo Kalibo ro sangka 32-anyos nga eaeaki nga presenteng naka-confine sa sangka pribadong ospital sa banwa it Kalibo.
Suno kay Nhiel Ike Onao Asiong, residente it Brgy. Loctuga, Libacao nga gindaea imaw sa ospital it anang asawa kahapon it agahon bangud sa sobrang pagpaeanakit it anang tiyan tuga it ginabatyag nga sakit sa bato.
Masobra tatlong dag-on eon sigon nana nga ginabatyag ro pagsakit it anang tiyan ag kinahang-ean eon nga ma-operahan.
Ginpakamayad sigon nanda nga magdiretso sa sangka pribadong ospital sa pagpati nga mapadali ro proseso it operasyon apang napas-eawan sanda.
Raya hay matapos nga ginlaygayan imaw it doktor nga risgo kung igapaidaeom imaw sa operasyon bangud nga samad ro andang generator rason nga ginsuhestiyon kara nga isaylo imaw sa ibang ospital.
Aminado si Asiong nga ro kakueangan it kwarta ro nagtueod kana para magtakas sa pasilidad matapos masayuran nga naga-abot eon sa P10,000 ro anang hospital bill sa sueod it pilang oras.
Ginapahayag nga kapin sa P5,000 eamang ro andang bitbit nga kwarta sa pag-adto it Kalibo.
Samtang, ginpakamayad man it Bombo News Team nga ibhan si Asiong sa Kalibo Municipal Police Station para magpangayo it nagakaigo nga laygay kung ano ro dapat nana nga himuon.
