KALIBO, Aklan—Madasig nga gin aksyonan it Local Government Unit (LGU) Kalibo may kaangtanan sa nasamad nga parte it tulay nga nagakonekta sa Sitio Karumahan ag Isla Pegado sa Bakhaw Sur, Kalibo.
Pamaagi sa Kalibo Municipal Engineering Office, temporaryong gin butangan anay it gin iping-iping nga mga butong ag gin sampawan it steal plate ro samad nga portion it tulay para magaserbi nga aeagyan it mga motorista ag pomoeuyo it nasambit nga lugar.
Sa pahayag it sangka residente nga si Henaro Dela Cruz it Isla Pegado, Bakhaw Sur, Kalibo nga temporaryong gin sarado it bilog nga adlaw ro tulay ku nagtaliwan nga April 25.
Suno pa kay Dela Cruz nga mabahoe nga bulig ro madasig nga aksyon it LGU-Kalibo bangud mas madali eon man para kanda nga mga pomoeuyo it nasambit nga lugar kapin sa mga may produkto nga kinahangean nga matabok adlaw-adlaw sa Brgy. Poblacion.
Samtang, indi pa sigon maka-agi ro mga tricycle bangud mga motorista eamang ro maka-igo nga mag-agi sa nasambit nga temporaryong daeanon.
Sa makaron, padayon ro ginapatigayon nga construction it MEO-Kalibo para madasig nga maayos ag mabalik sa dati ro samad nga portion it nasambit nga tulay.
