KALIBO, Aklan—Nagapati si re-elected Aklan 2nd district congressman Ted Haresco nga napierde si vice president Leni Robredo sa pagkapangueo sa bag-o eamang natapos nga 2022 national and local elections bangud nga kaabuan sa anang mga tagasuporta hay mga elitista ag mga manggaranon.
Mag-eowas kara, owa eon man suno kana nagakabagay ro strategy it anang campaign team sa mga mellenial partikular ro pagpili it political color ag ro peace symbol nga nauna eon nga gingamit kato pang tiempo ni dating pangueong Cory Aquino.
Suno kay cong. Haresco nga ro kulay nga pink ukon rosas hay nagasimbolo it mga elitista.
Dugang pa nga ro ulihing miting de avance ni Robredo hay ginpatigayon sa pang manggaranon nga lugar partikular sa Ayala Avenue sa katung-anan it mga high-rise building it Makati nga owa nasakyan it mga “common tao”.
Pirme man suno kana nga naga-trending si Robredo sa nagkaeain-eain nga social media platforms bangud sa mga pahayag kara ag ko anang tagasuporta eabi eon ro statement nga “if you are not for Leni you are bad”.
Nakasamad man sigon sa anang kandidatura ro pagiging frontliner ukon pag-partner kara sa makabayan bloc rason nga owa nakabaton it suporta halin sa pilang empleyado it gobyerno partikular sa military ag police.
Nasayuran pa suno kana nga maabu ro naging campaign fund ni robredo sa eleksyon.
Sa pihak nga parte, ginpasaeamatan man ni Haresco ro mga Aklanon nga nagboto sa anang suod nga amigo ag dating kaklase nga si Marcos nga sa bilog nga Western Visayas, sa Aklan eamang raya nagdaog pinaagi sa abanse nga 39 nga boto.
