KALIBO, Aklan–Ginpaathag it Land Transportation Franchising and Regulatory Board (LTFRB)-6 nga ro siyudad it Iloilo ag Bacolod pa eamang ro nakabuoe it Local Transport Public Route Plan ukon LTPRP sa bilog nga Western Visayas.
Ginpahayag ni Atty. Jun Altura, tagapaghambae it LTFRB-6 nga ro sambilog sa major component it jeepney modernization program hay ro pag-consolidate it mga unit sa mga kooperatiba kung siin maabu eon ro na-consolidate halin sa probinsya it Aklan.
Ro LTPRP hay ro basehan it mga lokal nga gobyerno kung ano nga klase it transportasyon ro magadaeagan sa partikular nga ruta.
Bangud nga owa pa it aprubado, ro mga magadaeagan anay nga unit hay ro mga gintaw-an it provisional authority it taeatapan.
Base sa direktiba it LTFRB, ro tanan nga prangkisa hay nag-expire ko Abril 30 kung siin ro mga indibidwal nga franchise holder nga na-consolidate sa idaeom it kooperatiba ag ro mga owa pa hay gintaw-an it extended provisional authority nga valid sa sueod it sang dag-on.
Dugang pa ni Atty. Altura nga ginaeauman nanda nga makapasa eon ro Aklan it LTPRP sa mas madali nga tyempo agud nga matumod eon kung pila ka mga unit ro magadaeagan sa sangka ruta.
